Kan Haw Dawn 8:44 PM

Thlasik rim a nam tak tak hi chu December thla chawhma lam a ni chauhva. Zingah tiau chhum a tla a, kan in hnual vel a kan chawhmeh chin leh pangpar te a bawm huh hliam a, chhum zing kara ni zung rawn eng raih te leh zan lama fulia fate hovin an sulhnu an chulmam loh perhpawng vung chhuah thar awm tat mai te, chinrang leh sava eng eng emaw ten hmanhlel taka thing pangang inlar hmasa chan loh hlauva an thlawk kual chung te chuan ngaihtuahna a kal ding tir a, lung hlui te lam lam a chawk tho thin.

He lal pian thla lo herchhuah kan nghahhlelh ve em em na chhan ber nia ka hria tak chu... "Kan haw dawn" tih hi a ni awm e. Kum 20 chuang, zirna avang te leh hnathawhna avang in, Zoram pawnah tap kualin, in bengbel viau tawh a kan inhriat hnuah pawh, Tlangsam a rawn par a, Ni hawi ten par an rawn chhuah meuh hi chuan, "Haw" na tur nei tlatin ka inhre thin.

Sap in 'Home is where Heart is' an ti em khah, ni e, Zoram pawnah hi chuan rilru a bet tak tak thei lo a ni e. Duh thalin, chung lama Pu te nena inhnial deuh rap rap chunga kan ngen chhuah Hard Earned Leave avail in kan han haw ta chu, thil ropui tak han tawn awm tak a nia, chutiang erawh a ni hauh si lo. Kan haw ngei a. Thil ropui tak erawh kan han tawng ngai lem lo. Mahse rilru a muang veng veng a, boruak hip te pawh a thiang bik a niang, kan harh kawk kawk mai. Hei hi kan ram a ni tih rilru in kan in hrilh nawn fo thin.

Tun tum pawh naktip mai khian Zoram lama chuang chhuak turin kan inbuatsaih a. Kan phur tlang surh surh khawp mai. U leh nau, laizawn te erawh chuan Christmas Gift an chang pha ta lo, an fate leh an nupui pasal te ngaihpawimawh an ngai ta zawk. Hmasawnna chi khat a nia nge. Chungtiang lamkhawma han bazaar vel ringawt te atang pawh chuan Lal Piang tur kan lo lawm tran reng tawh hi a lo ni a. A nuam tran viau mai. Tun trum phei chu November thla chawhnu lam atang khan ka nu in min rawn awmpui a, thil hawnsak tur neuh neuh an lo tam duh khawp mai a, kawr mawi mai bakah ngun mawi atanga Milton Tiffin Stack thlengin kan han in lamkhawm a, kan khualpang haw (zin ni zawk maw?) thin ngawt ai chuan kan bawr chho dawn te pawh a ang.

Engpawh nise, hun hlimawm, hun lawmawm an ti mawh lova, hlim taka awm tum phawt mai kha kan tihtur ni hmiang, inhnial buai leh in tramki kual lovin, nupa karah pawh, thian karah pawh, a pui a nawiin he hun lawmawm hi hman in tum tlang phawt mai teh ang u.

Thian te Krismas chibai buk nan hei hi kan zep tel talh a nge.

Vangpui leh Furtui a liam a,

Sikni kawlah lo her chhuak leh ta.

Chutin Lalpiancham lo inher,

Leh kumpui sul lo vei thin hian-

Thinlai lungrualpui thin zawngte,

Nghilhin min ngaihban tir love.

Thlangvai nun lah buai tual tual,

Lengrei kum lah uai tual tual:

Khuanu chuam keini chu phang lo u’n,

Hringnun kalsiam kan relna hmun-

Tuanna mual mualah;

Sehna ruam ruamah,

Thinlai zur lo nui hiauvin maw,

Lal Imanuela I awi ang aw!

Bethlehem Par 9:28 PM

Lal pian thla kan lo tleng leh ta. Rilru in Bethlehem lam a hawi. Boney M leh Siampuii kan ngaihthlak tawn zak zak laiin kan Bethlehem Par pawhin Lal piancham lo hmuah nan par a rawn chhuang ve hlawl mai. Bethlehem Par tih hi ka hriat dan a ni na chu, a dik chiah lo mai thei, mahse a hming hriatdan dang nei lovi, kan ti Bethlehem Par zel ni hmiang.

A par hun chhung hi a rei lo hle mai a, a kuhmum rawn parh chhuah tran atanga a parh chhung hi darkar 3 vel a ni a. A par parh vanglai tak hi chu darkar 1 pawh zu tling lova maw le. A parh tran atanga darkar 5 hmain a uai lehnghal thin.

A kuhmum rawn parh tran.....



Bethlehem par tih hming a put chhan a an sawi chu a par chhungah te hian Manger (Ran Chaw pekna thleng) ni awm tak mai a awm ve a, chu lo pawh Arsi ang tak mai a awm ve bawk. Naute leh Mari lam erawh a lang ve lo :) A arsi lem vel khi chu a hmuhtheih mai a, fei pawn ka kawhtir lem ta lova, a ranchaw pekna thleng erawh hi chu ngaihruatna telh deuh a ngaiin ka hria.




A side-view hi thlir ve reng reng teh ang. Pangpar nalh lo tak a ni lem lo.