Hna Lam Buai Ve Thung 7:48 PM

Nau awih hla sa a kan then durh durh hnu, a muhil tui dawn tan chiah tihah Telephone a rawn ri ral ral mai a, kan nau awih mut sa ve te te a rawn thawng harh thinrim tawh sa nak laiin, heitiang zan tai rekah tunge maw min rawn phone chu le" ti rilru nuah nuah chungin phur lo zetin phone chu kan la a.

Darkar 4 a liam ta, kawl a eng tan riai riai tawh tihah chuan kan Gas Pipeline atanga gas leak pawh hlauh dep dep na khawp a ni ta lo. Mei si per pakhat pawh lo inrawlh ve zeuh seng chuan kan nasa lo teh ang chu. Kei a source Well (Gas khur) lamah ka hmanrua neih ang ang leh kan zan duty 2 hruaiin ka tlan nghal kha a ni a, kan engineer dang pahnih kan Gas supply Grid (Gas kan tharchhuah sem darhna) lamah an tlan nghal bawk a. Pipeline a thui tham deuh (14 km) avangin darkar 4 vel lai mai kan bei a nih chu.

Khua a var meuh chuan Police nen, Lice lo nen, vai hawkdak hrim hrim leh inti Enviroment deuh deuh kan kat nuk nuk tawh a. Insawi fel leh fe a ngai dawn nih hi ka tih ruk laiin, Gas Leak na hmunhma chu kan han chian a, misual gas line a Condensatee (Petrol / Diesel a an pawlh thin) ruk tum tu te thil tih a lo ni hlauhva. A lawmawm letling zawk khawp mai.

Condensate hi Black Market ah lo chuan a awm lova, a hranpa a hralh a ni ngai lo. Pipeline leh Gas khur atang te a an ruk khawm hi Petrol Pump ah te hian an hralh thin a, Litre ah Rs 15/20 a ni tlangpui. Chu chu Diesel/Petrol ah te an lo pawlh ve leh thin. Tin, Condensate hi Petrol Engine thenkhat, Ambassador Car angah te hian a hlangin an thun a, engine hian zu tuar em em hauh lova. Hamara Desh siam nge nge .. lol

Police in hawkdak naran an hnawh darh hnuah, a hmun hma vel kan han en chiang a.

Miscreant (Misual rukru) ho chuan Clamp siamin 300 PSI pressure dawl zo tur Ball Valve vuah chu ti hian Pipeline ah bawltu (nut & bolt) hmangin an phuar bet a.

Bolt a phuar ngheh loh an hlau nge, cement te chuan an la char zui!!!! Lungral a tih ngial zu ngai a maw le..

Pipeline chhungah khian Gas khur atanga kan thar, Natural gas [2800 PSI or 197 kg/sq.cm] a luang a. Khitiang hmanraw dawrawm lutuk hmanga condensate lo luang tel ve lo "tap" tum chu a huaisen thlak hlein ka hria. Hrechiang tan chuan a tih a tih chi a ni lo. Khimi Ball Valve awmna clamp an fit hnuah valve khi an hawng a, a kua atang chuan pipe chu manual drill in an zuk verh ta a ni. Pipe kan hman khi API 5L X60 (16kpi - kilo pounds per inch) a ni a. Verh a har fuat ang, Pipe tha leh man to a ni. An verh pawh dawn hnaih ah Pipeline chhunga Gas pressure sang lutuk khan a rawn phin pawp a, control theih lohin Gas a rawn leak ta vak a ni. ninhliam lo niin a lang a, an vannei tawp ah ka ngai.

An clamp valve set up chu kan han phelh darh chhin a, an clap siam na thir pawh a pan hleng hlawng khawp mai. An tihsual lian deuh deuh te chu.. 1) Valve leh Clamp etc khi Pressure sang dawl zo tur an hmang lova, an hlawhchham. 2) Chu aia an hlawhchham leh zual na chu, pipeline chung lama an verh khi a ni. Gas Pipeline a Condensate lo tel ve te hi hnuai lamah hlir an luang thin a, chung lama an verh ah khi chuan Gas bak a chhuak lo.

He Welding lai picture hi a te bik riau, vawi 2 ka upload tha a, ti tho hi. Tilang ve mai mai a nge.

Hemi sirah hian Builukham hi a lo par ve nget a, hmun ro leh thlaler tak maia lo awm ve ve ve mai chu a mawi reuh em a, kan vawm bei ve mai mai a nge.

Zan dar 12:00 vela a biling a balanga kan chhuak kha, a tuk tlai dar 3:30 ah in kan lut leh chiah a, mut a tui duh vung vung hle mai.

Fapa Pek Kan Ni Ta..... 6:18 PM

Ka la hrereng, April thla a ni a, khua a nuam hle mai. Kan chhak kham a sava rawn hram chiah chiah te, kan zawngtah kung upa tawh tak, thang lian thei si lo, a rah erawh tam ngai lo mahse tui em em mai zara eng va nge tih ka hriat ve loh te rawn inchhaih zar zar mai te, chhun rawla naupang hlim taka infiam ri, an thil tih tur tak tih hma si a ro an rel chhung rei em em mai thawm te, tlai ni tla tur sen phut mai te lam lam chuan kan Zoram boruak hip nawm zia min hriat chhuah tir thin. Vai ram lum uap churh mai leh thosi tam em em na hmuna ami a zawng buaina leh hmanhmawhna in a um nilen thin kara khawsak nen chuan a dang bawk a ni.

Kan chhungkaw tih thin angin Chawlhni tlai khat chu Chhungkaw Tawngtai rualna kan nei a. Ka nau nupui neih dawn vang a ni. Enge maw, kan chhungkaw tana thil lian tham kan tih/thutlukna kan siam dawn hian kan nei thin reng a. Zanriah lam kan buatsaih zawhin kawngka kan inkharkhung a, Nu ber a rawn ding chhuak a. Ka nau te inneih na tur chungchang Pathian hnena thlen ngai a tih te a sawi zawhin kan upa ber a rawn ding a, “Hei, David-a te nupa hian fapa an la nei lova, Pathian malsawmna dawnga fapa an neih theih nan tawngtai bawk ila a tha a nge” a rawn ti ta mai a.

Keini nupa ngaihdan ah chuan, ni e, fapa chu awt em em mah ila, kan tana Pathian in a ruat a nih loh chuan a uchuaka awh a tulna kan hre lem lova. Hei, Pathian in Fanu pahnih min pe tawh a, tunlai chhanah a tawk viau lawm ni kan tih ruk laiin chutiang thil chu a ri ta a ni a.

Kan tawngtai ta poh kha a ni a. A hlawhtlin kan rin lem loh vang nge, engmah plan pawh kan nei zui chuang lem lo.

Inneih te hmang zovin kan awmna lamah kan liam thla leh a. Hun a inher zel a, July thla tawp lam chuan kan nu chuan insawiselna neuh neuh a nei ta mai a. Rinhlelhna kan neih miah loh vang nge, doctor kan rawn tum hnih na a a zun test tura min rawn pawh chuan kan nui mai a. Doctor thu chu doctor thu a lawm, in test poh ang hmiang kan ti a. Kan han test chu nau a lo pai reng mai chu a lo ni a. Doctor chuan “Zaninah lo inngaihtuah ula, pai zawm zel in tum leh tum loh naktukah min hrilh dawn nia, a hma thei ang bera decision in siam a ngai” a tih hnu chuan kan haw ta a. Tumah kan hrilh lo!

A tuk pawh nghak thleng zo lo chuan Phone in doctor chu, “E, Pathianin fanau malsawmna min pe dawn a, keini lo tih tawp mai chi a ni lo e, kan continue ang” ka han tih chuan, damdawi prescription chu a rawn thawn a, kan in buatsaih tran ta chu a ni ta mai a.

Thla kua-na thla a kai tep tawh a, nau neih hun tura min hrilh lawk thla khat dawn lai la awm mahse, Ultrasonograhphy result chu doctor duhthusam a a that loh avangin a hun tak hmaa zai a ngaih tur thu chuan kan lung a ti hnur hle mai. Chutih lai tak chuan, hei leh chena ka rin ngai loh leh engvak maha ka ngaih ngai loh, Tawngtai damthei, Mizo ngei mai chu Pastor pathumin kan inah an rawn hruai lut hlawl mai a. Mak ka ti hle mai. Chupa (A hming pawh ka hre ta lo a, zia lo hle mai) chuan an tawngtai a, “In fa lo piang tur hi Thlarau Thianghlim pek liau liau che u a nih hi, a chhinchhiah tawh bawk. Naute a nih tur ang ang a ni tawh a, ni rei lo te ah in nei ang. Engmah that lohna a awm lo” a ti a. Thla a muang sawt mai. A tukah chuan in check up turin Hospitalah kan kal ta a.

“Naktuk dar 1:30 ah kan zai dawn che nia, tunah admission ti nghal rawh u” doctor in a tih atang khan vawiin hi thawk ka lak lehna hmasa ber a ni. J.

A tuk March ni 5 chuan emergency dang a awm avangin doctor chu a rawn tlai hle mai a. A rawn thlen veleh Operation Theatre ah a lut nghal a, tlai dar 3:15 chuan Fapa, kan mita duhawm tak mai leh hmuhnawm, Pathian hnen atanga kan dil chhuah ngei mai chu Pekin kan awm ta. A va lawmawm em.

A hming sak chungchang te pawh sawi nghal ila a tha awm e a. A hming sak dawn hian rilru a awm, sawi loh theih loh a awm ve a. Ka pa, R.L Thantluanga khan March ni 5, 1995, tlai dar 3:15 ah he khawvel hi a chhuahsan a. Chu ni leh darkar chiah chu Pathianin fapa min pek hun atana a thlan a ni tlat mai hian rilru a ti kalthui hle mai a. A hmingah pawh Pathian Khawngaihna dawnnna lam hawi si, ka pa hming lam chawi bawk si ni sela ka ti a. Kan nu chuan, “Jonathana ti ila, Pathian Khawngaihna tihna a lawm” an ti a. Tha viau mai, mahse ka pa hming kan chawi tir bawk chuan ‘Than’ kha a awm double lutuk a nge, Johan tih pawh Pathian Khawngaihna tihna lam kawk tho a lawm tiin JOHAN THANTLUANGA kan sa ta a ni. Pathian khawngaihna kan va dawng ropui tak em. Tawngtaina chhangtu Lalpa chu fakin awm rawh se.