Chhangchhepa Tlai Lam... 10:18 PM

Thawhtan ni hi chu Ni Sakei a va ni tehlul em! Office hna lam buai chu thukhat, in lam thleng thleng hian Thawhtan Sakei hian min nawr tawm thin in ka hre thin. Hah hnep leh mit thial urh a Office lam hna kan thawh zawh hnuah, chawlh hahdamna leh lungmuang taka Chhungkaw chen khawm nana Pathian in min pek kan IN lam chu ka pan a. Ina ka pen luh rual rual chuan min hmuaktu erawh Chawlh Hahdamna lam hawia han chhiar tur thil hmuh tur a vang kher mai.

Ni dang ang lo takin rin ai tak chuan kan inchhung chu a lo fel thluam a, Sofa ah pawh suankual leh nawhlung hmuh tur a awm miah lo, cushion kar kan keu chhin a, TV remote tih loh chu Lipstick hmanral tawh leh naupang thinrik pawh hmuh tur zu awm miah lova! Banga A B C leh milem chhe fahrana in ziak rang pawh ziah belh hauh lovin nimin lam ami chauh kha an la ni. Glass Vase a nu ber Plant khawi erawh chuan a mamawh aia tam tui a dawn ni a ni thung, chhuatah a luang kawi ngiai a, naupan zun emaw ti tan chuan chek tlawk tlawk na tham a ni ta ve ang. A ni lo hlauh. Dettol leh Phenyl tel lova pawnchhe ro a hruk ringawt theih category ami a ni!

Bed room hmatawng zawk ka va lut chu almirah var zawk bulah hian beng pawtin an unau chuan an lo ding dun ran mai a, engemaw thil bawhchhiat lian tham tak an nei tih a chiang mai, nu ber pawh a lo vei chak tawh khawp mai. Maidservant in tum deuh hmakin naute a lo pawm a, beisei loh leh rin loh takin inchhung a reh thiap.

“Engati ta nge, in va reh thip thiap ve, Pui-Pui, eng thil nge in tihsual a?”
“A U’n pangpar tui pekna pipe kha a lo la a, Fish bowl ah tui kan pe a”
“Ka lak a ni lo, nangma lak a nih kha, tui herh tawp rawh ka tia, i herh tawp lo a nih kha”


“Pawna i pipe dah that leh loh kha an va hmu a, tui an herh haw a, in chhungah an rawn khawh tir a nih kha, harh leh lutuk, umzui reng hi an ngai a, ka hman reng bik hleinem, naute enkawl a ngai bawk” Nu berin an tih chhum hmak hmak tawh chuan sawi tur a vang kawp mai. Thil engkim mai hi a kal sual zeuh chuan, Pa thiam loh a ni deuh zel!!!

Chutia Rorelna Court hawnga kan in rel fel zawh meuh chuan a lo tlai ta hle mai a, naupang ril tam pawh an chiau hiar ngam leh tawh a. Naute muthilh laia chaw ei fel thak mai hi tuma min zirtir lohva kan tawn hriat awm chhun a ni awm e. Chhung Inkhawm nei turin kan han in hawr khawm a, khawilai kohhran te deuh ang maiin chhung inkhawm apianga hun hmang duh chu mipui zahve aia tam kan ni ziah erawh hi chuan Rorelna Court min thlen tam tir thin. Nitin Lalpa Nen bu thum hi kan kumkhat tla tawk a nih hian tawngkam tel hauh si lovin thil thui tak a sawi nia. A te ber dawttu atangin kan han hmang tan a, a U in a hman zawh a Pa berin ka hman zawh meuh chuan nau mu pawh a tho hman hial thin reng a ni. Hun hmangtu in a hman zawh apianga Lal Tawngtaina sawi ziah ngai hi tih tawp dan tactic ka la hmuchhuak ang, tumah hrilh ka tum lo! Chhung Inkhawma Lal Tawngtaina vawi 1 aia tam sawi loh dan hre duh chuan lo hmu chhuak ve mai rawh se!!!

“Zanin chu engmah chawhmeh kan siam hman lova nia, vawiin chhun ami kha kan chhuang lum a, chu chu a ni mai. Sapna-i (Chawchhum) a lo kal lo nileng a”.
“Vawiin chhun chuan enge in lo hmeh a?”

“E, Nizan ami thing kha kan ring”!!!!

Hmnnn… Office tlai chhuanlamin hotelah ka lo ei daih lo a ni ti rilru ngam pawh kan ni love. Engemaw titi in kan inhnawh puar ve mai a, dammawh hritlan ilo velin min tlakbuak loh hi chuan, a vaia vai luh lam na na na chu a vailuh tur tui lem lo mahse, kan ti thei viau zel a, Pathian malsawmna hi kan va dawng nasa em! Nau tap in pawm chhawk ngai lo phei seng chuan chaw no 1 te lek lek ti thei thah kan la ni ang chu maw le.

Naupang tih mut a hun meuh chuan, bathroom basin tap leak repair hman loh te, khum bul table-a drawer hmai bal char that hman loh te, Nu ber mutna lam side bed switch thlak hman loh te chu kan han in remind leh zuai zuai a, thiamna reng nei lo hian kan mu zantin mai a nih ber hi maw? Fiamthu pakhat, Thatchhe Thufing – I tihtur ti nghal mai suh, tih a ngai leh lo hlauh thei- tih pawn nuih a tiza pha thin lo!

A te zawkin,
“A pa, ngatinge i mut hlan hian ‘Kro-Kuk Kro-Kuk’ I tih ziah?”
“Kro-kuk Kro-kuk ka tih thin pawh ka va hre love, engtihna nge?”
A lian zawkin,
“A pa, i hnar thin kha Kro-kuk a tia lawm, Pui-Pui, i va a tak, hnar ti ta che, kro-kuk a ni lo”

“Inhnial an tan leh dawn. Zaninah…. Sawi ula, muhil rawh u, tumah tawng tawh loh tur, light ka off dawn”.

In vau chungin kan in awi muhil a, in vau bawkin zing kan tho leh thin hi chu Rilru lam doctor te ngaihdan a nih ka ring chiah thin lo. Eng kan tih ang le!

LAL ISUA ZIRTIRNA 2:11 AM

Picture source: http://www.preceptaustin.org

Vawiin Sunday a ni bawk a, Pathian thu lam aw.

Tirhkoh Paula lehkhathawn hi a lar khawp mai. Sermon tam zawk ka ngaihthlak ve hi chu Tirhkoh Paula lehkhathawn behchhan a ni. Kan Lalpa leh Chhandamtu Lal Isua Krista hian eng chiah hi nge TI SUH U a tih, TI RAWH U a tih tih hi kan chhut ngai em aw. Post a thui lutuk loh nan Tlang Chunga a thusawi atang te chauh hian kan Lapa Zirtirna chu engnge ni chiah I lo thlir hi ho teh ang u. Heng a hnuaia ka ziah ho hi Mathaia 5-7:29 inkar behchhan a ziah a ni e.

Lal Isuan “TI RAWH” a tih te.

1. Thuhnuairawlh tur. Fel tur. Mi khawngaih tur. Thinlung thianghlim neih tur. Remna siamtu nih tur. Heng kan tiha nihlawhna chi hrang hrang a sawi tel bawk.

2. Lawm turin min ti. Engvangin? Vanah lawmman dawn tur kan neih vangin. (Lei malsawmna kan dawn vanga lawm tura min tih ka hmu zo lo tlat).

3. Thil Thra i ti tur a ni. Thil tha tiha Chhandam theih kan ni lo tih a lar hle. Mahse Lal Isua chuan Thil Thra ti turin thupek min pe. Lal Isua thusawi awih mai hi Chhandamna a ni.

4. I Fel tur a ni. Pharisai te leh Lehkhaziaktute (Juda sakhaw zirtirtute) chu Felna ah kan khum loh chuan vanram kan kai loh tur a sawi. Vanram kai tur chuan FEL a ngai a nih chu. Misual vanramah an kai dawn lo, an sual an sima an FEL phawt loh chuan.

5. I vengte, i hmelma te pawh i HMANGAIH tur a ni. Tawngtaisak bawk tur.

6. I thra famkim tur a ni. (Mahni chakna ngawt chuan a har khawp ang). Mahse tha famkim tur kan ni. Engvangin, Lal Isuan min ti miau!

7. Leiah ni lo, VANah kan RO te khawl tur. Kan ro awmna VANah khian kan rilru a awm em? Nge vanah Ro kan nei lova, kan neihna Bank ah te, inhmun lo ramah te, kan hnaah te hian kan rilru zawng zawng a awm zawk?

8. I duh chu A hnenah dilin i zawng tur ani.

9. Miin i chunga an tiha i duh tur ang bawkin mi chungah pawh i ti ve tur a ni.

10. Kawngka zimah luh tur. A hniak tam lam lam zui hi thiamchanna a ni lo. Kawng dik chu hrehawmin zim mahse, zawhtu tlem mahse, i zawh tur a ni.

11. Tawngtai dan min zirtir angin tawngtai thin tur. Lal Biakna / Lal Tawngkaina / The Lord’s Prayer kan tih hi.

Lal Isuan “TI SUH” a tihte.

1. I Unau chungah Thinur suh. “Mi Chhawihpa” tia koh loh tur. “Mi a pa” tih phei chu hremhmun tlakna khawp a ni. I thilpek ai khan i unau i rem kha a pawimawh hmasa zawk.

2. I uire tur a ni lo (Hmeichhe ngaih chaka melh pawh uire).

3. Nupui a uire a nih loh chuan Mak a thiang lo. Mak hnu lo neih pawh uirena (mipa) a ni.

4. Chhia reng reng chham loh tur. A ni chu a ni, ni lo chu ni lo a ni mai tur a ni. Chung aia a chuang a liam chu sual laka chhuak a ni.

5. Misual dodal suh. (Hei chu mak ti deuh mah ila, awih mai tur). I biang lehlama bengtu chu lehlam pawh dawh rawh. A diltu hnenah pe la, i laka pawisa puk duh tu hawisan suh.

6. Thil thra chu mi hmuha i lan mawina leh fak i hlawhna atan mai i ti tur a ni lo.

7. I tawngtaiin mi fak hlawh duh vang maiin mi hmuh turin i tawngtai tur a ni lo. Thinlung leh tih takzetin Pathian chu i be zawk tur a ni. I tawngtaiin sawi ngai sawi nawn tlut tlut suh.

8. Chawnghei pawhin inti chaw nghei taka mi hmuh leh fak hlawh beiseiin, chaw nghei I ni tih tilang suh.

9. Pathian leh Sum (Pawisa) rawng i bawl kawp thei lo.

10. Ei leh In, damchhung khawsakna leh Silh leh fen lungkham suh. A ram leh a felna zawng hmasa la (Pathian ram leh amah anga fel tura min duhna chu dah pawimawh hmasa in zawm la), heng khawvel khawsakna a i mamawh zawng zawng chu a vur in a vur zawk ang che.

11. Mi dang sawisel suh.

TLIPNA:

“Lalpa Lalpa mi ti na zawng van ramah an lut tawp lovang; ka Pa vana mi duhzawng titu erawh chu an lut ang”. “Lalpa I hmingin thute kan sawiin, I hmingin ramhuaite kan hnawt chhuakin, I hmingin thil mak tam takte kan ti thin lo vem ni” an la ti ang. Lal Isua erawh chuan “Nangni thil sual tite u, ka hre ngai lo va che u, ka hnen ata kal bo rawh u” tiin a la chhang dawn. Chhandam nia inhria, thil sual ti ru reng, a ruk kher lo pawha la ti reng - kohhran member, Upa, Pastor, Revival speaker, Tihdam theihna chang, Tawngtai damthei te pawh, Lal Isua hnen an thleng dawn hauh lo. Pharisaite felna I khum em le.

Lal Isuan khing tlang chunga a sawi te khi a sawi liam puat hauh lo mai. Ka thusawi hriaa zawm apiang te chu mi fing, lungpui chunga in sa nen tehkhin tur, zawm duh lo tu te pawh tiau vut chunga insa nen tehkhin tur a ti fan. I ngai pawimawh ang u.

Chhandamna hi nitin kan hlawhchhuah zel a ngai. Engtin nge kan hlawh chhuah ang? A thusawi te zawm mai. Sawi kual thui vak pawh a ngai hran lo, a tam zawk khi chu. Zawm mai tura a sawi te an ni. Zawm si lo, sawi hnianghnar tui fan kual vel kha Chhandama awmna a ni lo.