Sap Ram Zin - Part 2. 5:48 AM

Ningani, 7th July 2011 a ni a. USA a zin tur chuan kan inlum kan chhuahsan a. Nupui fanau ten dibrugarh Airport ah min rawn thlah a, airport chhunga ka luhsan tur, min rawn thlir thap chuan rilru a khawih ve duh hle mai. Phone in kan nu ka bia a, in haw lamah Sohum Shoppe ah lut kawi ula, naupang ho kha an duh duh I leisak dawn nia kan ti ngawt a, han duat dan teh vak dang awm hek lo!

Thlawhna a tlai vangin tlai thim dawnah Kolkata kan thleng a. Big Bazaar ah ngei mai dailuah, buhfai, Maggie leh biscuit te kan va lei a, kan bag a thawl dun deuh vang nge, Microwave cookware (Plastic chi) te pawh 1 ve ve kan lei nghe nghe a. Sum in save chu kan tum khawp mai! Kan Travel Agent te chu foreign exchange vel an tihfel tawh leh tawh loh kan zawt a, in foreign exchange tur hi a buai deuh hlek, in puten an la approve lo an rawn ti heu mai! Keimahni sum US pawisa a thlenga kal mai tur emaw ka tih kha a lo ni re re lo mai a. Kan Company hotuten kan allownce tur zawng zawng kha a US pawisa a min pek a lo ngai chu niin. An va ti khawlhkham buai peih tak e aw ti chungin tih theih awm si lo le.

A tuk, ni 8th pawh chuan Delhi lam kan Headquarter ah kan phone zak zak a, Foreign Exchange Release letter, RBI hnena kan company hotu ten an dilna / phalna lehkha a awm loh chuan kan Agent ten official in pawisa min pe thei si lo. Official a kan dawn loh chuan let leh hunah kan zinna kan senso settle nan kha official letter kha a ngai si. An bei chingchivet vei nek mai. Nilengin chu chu kan buaipui a ni ber e. Itinerary kan siam lai khan Delhi atanga chhuak turin ngatinge kan lo siam loh aww kan ti, a sawt tawh si lo. Kolkata atanga Delhi ami kan hotute nawr chu a hahthlak dan a a dang deuh! Tlai dar 6 ah Kolkata kan office ah fax a rawn thleng a, Travel Agent ah kan tlanpuia, Foreign Exchange ti tur chuan kan tlai tawh si a, in pawisa neihsa min pe mai ula, naktukah he lehkha hmang hian in draw leh mai dawn lawm kan tih lahin an ni lah chuan Foreign Exchange rate a danglam renga, eng rate in nge kan pek ang che u kan hre si lova, bakah pawisa in dawnna receipt kha a thlak theih tawh sawn si lova, naktukah kan ti ang, in dawng hman ang an ti a, lungawi fahran lo chuan Hotel lam kan pan leh ta a. Itinerary kan siam ho lai khan an help tur kan chhuh then deuh vang nge, min pui phur sarh lo khawp mai haha.

Ni 9th July zing dar 10 ah chuan pawisa (US dollar) chu an sawi angin min rawn pe a, a nuam tan hle mai :), zin chhunga hman tur Mobile SIM Card te pawh kan chah ang thlapin an rawn keng nghal a, rin ai takin a to lem lo. Puar peng pawngin Bengali chaw kan ei a, kan han mu vang vang a, tlai lam thingpui (Nasta) puar peng pawngin kan ei hnuin dar 5:00 pm chuan Airport lam kan pan ta a. Foreign a la kal ngai miah lo ka ni bawk a, an International Terminal pawh Domestic ai chuan pui deuh turah ka ngai a. Ka ngai dik lo! Domestic aiin a lo pachhe fe mai! Kan thlawhna chuanna tur Emirates Airline hi Arsenal ka tan vang pawh a ni chuang lo, kan zinna tur kawng zawh zingah chuan, an service a tha ber an tih teh tlat chu! Lehkha eng eng emaw fill up tur min pe a, kan ziak ve nuap nuap a, min check in a, immigration lamah India kan chhuahsan ni seal nen kan passportah an chhu kai a, thlawhna nghah a ni tawh mai! Ngaiteh, WiFi takngial pawh a awm lo nia!

Zan dar 8:00 ah chuan Emarites Airline flight no. EK-573 chungah chuan min khalh lut ve ta a. Thlawhna chhung chu a lian tha deng deng hle mai. Thutna kha la chhuak vek ila, kan naupan laia football kan khelhna Sande Sikul Hall chung aiin a zau mah ang a tih tur a ni! A thui lamah phei chuan a thui zawk hrim hrim! Ramdina pawhin a khalh tlang thei bik miah lovang! Business Class ho an inkhuhna tur kaihkun te nena lo thu tlum hmak kan kalpel phei zel a, kan thutna tur Middle Row, naupawm ho seat hnungah middle seat ah chuan kan thu ve ta thaih a. Ka ke kan siksawi vel chhin a, a thawl nuam tawk khawp e.

Zan Dar 8:30 chuan Arabic in an rawn tawng zawt zawt a, sap tawnga an puan pawh phelh nel nuala hrethiam thin tan chuan kawng a thui dawn mange ka tih ruk laiin aw hriat nuam tak mai, muang fan raih hian Sap tawng chuan an rawn puang leh a, ngaih a ngam ta deuh! Kan hma a thu Arab chhungkua kha an va buai tak, naupang 2 an zinpuia, ka bul chiahah khan an pa ber, tawng thei zet mai hi a thu lehnghal a, kan veng kawn chu nisela ka pen fawk duh awm e a. Kan thlawhchhuah tak hnu chuan a hma lama a nupui leh fanu 2 thu te a va ngaihven a ta langin a thutna kha a awl titih deuh renga, a nuam ta phian a! An chaw sem pawh a tui e. Ka thianpa chuan whiskey a lam deuh reng mai a, Dubaiah thlawhna thlak a ngai a nia aw, thianpa ka tih pawhin, peg 4 chauh a lawm ka la in, zin kawngah bak zu ka in lo ang, lungngai suh min ti a, nuam a ti ham ham khawp mai!

Khawthlang lam pana thlawk kan ni bawk a, zan a rei duh ngar ngar khawp mai. Mahse movie collection an lo nei tha nek a, 1000 chuang zinga ka duh ber 2 chu ka en zo tihin Dubai kan thleng a. Thlawhna thlak tur a nih vangin kan chhuk a, an Airport chu a lo pui hle mai, Shopping Mall lian tak hi a ni ringawt e.

Haw lama kan thiante thil min chah lei hawna tur kan enkual thuak thuak a, tlem a zawng kan inthun puar a, thlawhna lamah kan kal leh ta a.

Sap Ram Zin - Part 1 10:05 PM

(Mi dang chhiar atan em em a ti pawh ni lo mah ila, hetah hian thil chhinchhiahna angreng in lo awm ve mai mai sela, theihnghilh hma a ziaka awm ve hi a that kan ring deuh a ni. Part 1 Part 2 zawng hian dah ila, vawikhata ziah teuh ka tlin ka ring lo deuh.)

          Ka thawhna Company hian a engineer te hi foreign a training turin a tir fova, Department awmna a zirin a then an kal hma deuhva, a then an kal tlai deuhva. A training lam ngaih pawimawh em em rualin, incentive pakhat a nihna lai te a awm ve a, kei pawh pute duhsakna nge, ka number a thlen ve tawh hrim hrim vang, USA a training turin min ti ve hlauh mai.


          Hetia US trip nei tur te hian kan duhna hmun leh training na tur hi kan in zawn chawp mai thin a. Ka phur em em lem loh vangin ka zawng tha meuh lo, vawi hnih khat chu internet ah ka en kual ve thuak thuak awm e. Mahse ka kalpui tur pa a phur a, a chak bawk a, a zawng taima khawp mai. Thianpa chuan Petroskill, Oil and Gas industry lama training pe thin, USA ami chu an training schedule leh topics te min raw thawn a, a tha a lawm ka ti liam ve satliah mai a, May thla ni 12 atanga tan tur, Training on Well Completion and Workover, Bakers Field, California a training nei turin Proposal chu kan company hotute hnenah kan thawn ta a.


          Hun a kal a, process chhung neuh neuh a rei a, kei phei chuan ka lo theihnghilh hman a, approval a rawn thlen meuh chuan kan training hun tur a lo pel daih tawh mai a. Mahse Foreign Trip hrim hrim hi kan hotuten vawi 1 an approved tawh chuan reschedule theih a lo ni hloh va, 11th July 2011 atanga tan turin, Katy, Houston (Texas) a Petroskill buatsaih tho , Well Completion and Workover attend tur chuan phalna kan la leh a.


          Visa apply hi an sawi huphurhawm viau mai a, kan inbuatsaih nasa rawh e. Medical test kan ti a, documents ngai an tih pawh 27 vel lai chu kan la khawm, mahse rin ang he hu a lo ni lem lo. Ka hriat tlem vang te pawh a nimahna. Ni 20.06.2011 a Kolkata a Visa Interview kan va neih pawhin zawhna 2 chiah min zawt, “Engti turin nge US kal I duh? Eng chen nge I cham ang?” tih chiah a ni. Documents pawh a file a filein ka pe lut kha a nia, pahnih chiah an la. Petroskill in training attend tur a min rawn sawmna lehkha leh kan Company in ‘hepa US kalna atana veivahna, riahna, ei man hi kan tum vek ang’ a tihna certificate chiah kha an la. Thla an la a, kut tang leh kutphah finger print an la a, VISA chu kum 10 chhung atan min pe ve mai a, harsatna kan tawk lem lo.


          Company in kan nikhat rate atana pawisa min pek zat hi a tawk angreng fu a, mahse naupang lawmzawng han hawn ve na tur help tel kan tum vang te pawh a niang, pawisa renchem dank an ngaihtuah a. Visa kan hmuh tuk chuan Authorised Travel Agent (kan company dawr bik thin te) kan pan hma in Hotelah thianpa nen veivahna+hotel etc tlawm theih dan ngaihtuahin Internet ah kan hun kan hmang nileng a ni ber e.  Plan A, B… D thlenga in siam felin Travel Agent chu kan va dawr ta a, phakar leh phakar indawr kan ni bawk a, kan nileng leh teuh hle! Trip Itinerary pawh kan duhthusam zan ni lo mahse, kan lungawina zan in kan siam zo thei a, Travel Agent te khan phakar min ti ve ngawt ang chu  . A tuk chuan kan hnthawhna hmun lamah kan let chho leh ta a.


          Chhungte hruai hi ka ngaihtuahna hmasa berah a lo lut a. Han inpuan ta deuh ila, mahni kekawrte takngial pawh su ngai lo, chaw ei dawhkana nupui te chaw chhawp ei tawp, thleng pawh seng lova tho leh tawp thin tan chuan ngaihtuahawm reng te pawh a ni mahna! Mahse sum sen belh zat tur ngaihtuahin leh kan fate kal vet a tehreng sela, an thil hmuh leh tawn te hre zui em em rual an la ni lova, ningkhawng an hriat deuh huna hruai ah ka in hnem ta a ni deuh ber mai. Kan nu ngaihdan pawh a lo ni ve chiah a, a tihzia hle mai 


          Inbuatsaihna hun thawl kan nei hi a vanneih thlak khawp mai. Thian thenkhat kal te chu Visa an hmuh tuk maia liam ngai te an ni hlawm. Planning pawh fel fai takin kan siam theih phah a. Kan zuk training na tur subject te pawh hmai a zah lutuk loh nan kan lo inen lawk ve bawk a. Hmun hrang hrang kan tlawh kual tur te pawh hawihai lutuk bik lo turin a hmun leh subject chanchin ilo vel te kan khawnkhawm a, exam em em awm dawn lo mahse hriatlohna vanga zahna tawn ka tum miah lo thung! Bakah Tourist attractions hmun hrang hrang kan tlawh turah te pawh eng eng nge awm? A enga te nge lar leh mi tlawh hlawh, hmuhnawm leh hlawkthlak ang tih te ka enkual hle bawk. Chutiang chuan theih ang tawk tawkin kan inbuatsaih ve a nih ber awm chu maw.

Wild Orchid & Others- Picture 7:58 AM

Thlalak hi vawm bei leh thlawrh mai ang, sawi kual duah lovin.... Hmanni rama kan kala ka lak, a hming ka hre lo lehpek! Pangpar hming hriat loh hi hausakna nise, ka hausa tawh ngawt ang! :)
Pic 1: Ram Nauban, single te in a par ve ve ve.

Pic 2: Bih hnai deuh chhin.

Pic 3: Easter Par ang deuh, hming chu a nei ang! :)

Pic 3: BONUS! Hmun dangah ka post kual nual tawh na chu hetah pawh hian dah ve mai mai ang

Pic 4: BONUS-2! Hei pawh chuti bawk.

Photography - Pangpar bawk! 1:28 AM

Thlalak lam bawk hi post leh pawp mai ang, thu leh hla lam thiam ve hek lo i, sawi kual tam vak ngai lo hi a lo tha ber mai :) Hre duh an awm takin, Post Processing ah Photoshop CS5 ka hmang, Crop nan leh watermark dah nan.

Pic 1 : Pangpar kuhmum, pangpar hmingah hian ka pachhiat a zual hle mai :) a hming ka hre lo lehpek! (Photography lam tui deuh tan : f/5.6, 1/80sec, ISO-200, focal length 150mm, metering : spot, subject distance : 600mm, exposer: manual, WB: Auto.

Pic 2 : A par parh tep pawh hi dah ve ang, (Photography lam tui deuh tan : f/5.6, 1/100sec, ISO-200, focal length 200mm, metering :spot, subject distance : 710mm, exposer: manual, WB: Auto.

Pic 3 : A par parh dawn ta. (Photography lam tui deuh tan : f/5.6, 1/400sec, ISO-200, focal length 200mm, metering :spot, subject distance :1300mm, exposer: manual, WB: Auto.

A par parh hun chu ka nghak ta lo mai, zinna kawng a ka lak a ni a, cham chilh ngawt thu lah va awm suh :)

Balhla Sen 8:34 AM

Tui kan cheng ei tawh e mai, Balhla mak deuh hi post pawp ang, run dalah. A tumbu hi ka lo hmu hman lova, ka hmuh chuan a lo bal / bo tawh. A zik atanga rawn uaithla lovin a chawr in a rawn chawr chhuak a, a sen ang thur a, ka vawi khat hmuhna a ni. A hming phei chu ka hre lo lehzual.

Bih hnai deuh chhin teh ang..

Photo Post : Tui Cheng 6:11 AM

Vawiin chu hman deuh tawh, Johana pian hma deuhva kan tuicheng thlalak, ka ti bo emaw ka tih tawh kha ka hmu chhuak hlauh mai a, a bo emaw ka tih lai khan ka ui hle a, han hmuhchhuah leh takah chuan tah hian post hial teh ang.

Thlalak ropui tak chu a ni lem lo. Camera pawh Sony Digital Camera S-600 hmanga lak an ni, ka D3000 neih hma ami. Mahse pangpar post leh tawp ai chuan recreational activity lam hawi deuh hi thlir a nuam deuh mahna.

Pic 1. Kan vah thlen theih ve theih tawkah, tuicheng tura kal khan, naupang tuichen thawmhnaw pawh kan lo keng lem lova, tum vak lo, tawn chawp thil deuh a ni bawk a, kan kal hang hle. Chuvang a niang, hetiang lam hian rilru a pawt zawk mah mah.


Pic 2: Varak rel ah an han chuang leh te te a


Pic 3: A U zawkin khitiang vir-muai-sakawr khi zu ngaisang em em a maw le. Chuang mawlh phawt teh se :)


Pic 4: Tui kan chen pui, Pa (Mushroom) lem hnuaiah hian an thaw a chham, ka awm rei pui thei nawh..


Pic 5: A nau zawk hian tui lawm viau e ti lovin, min thlah duh hauh lo, a kiar a kiar in lang ve mai ang


Pic 6: Evelyn-i, Vawt khau khau tawh viau ni tur a ni


Pic 7: Bawihte-i pawh, a kham mawh khawp mai


Pic 8: A tawp a tawpah chuan kan inko chhuak thei, a hah deuh nge, a mu ta zar mai.


Pic 9: Ka-a chhang lam pawh a ngai ve zel, ril a tam duh fuat


Pic 10: ".... If you see a crocodile, don't forget to scream, OUW!"


Pic 11: Reflection.... telh ve leh mai mai ang, a mawng hnawh nan :)

Kan Haw! (Pic Post) 8:20 PM

Update khat ngar ngar bawk a, a lo hmuar hman tep a lawm le.... A zia lo hle mai. Run dalah update ang aw.

Kritmat leh Kumthar hmang turin Aizawl lamah kan haw chhova, thla lak lam pawh a lang vak lo a niang, Camera pawh ka hawn lova. In kan thleng, ni hnih khat kan cham hnu chuan thlalak tur a lo tam ngang mai a, ka nau Camera (D50 + 18-135mm non-VR lens) ka hmansak ta hle. Ka hman thin nen a lo inang lo viau mai a, ka khawr hle. Bakah Lens hian kut khur deuh leh thil che deuh a ngaithei lo riau mai a, zoom hman loh theih thin si lova, thlalak a quality a kual tha lo khawp mai.

Engpawhnise, sawi kur dup lovin, ka picture neih ang ang hi bel mawlh mawlh phawt mai teh ang, a tahtawl te te in.

Pic 1. Lengpui Airport pawn lei han rah chiah hi chu a van nuam thin tak em, kan hlim. Min nghak tu te pawh an hlim!


Pic 2: Chhangchhe Pa a lo ni tawh mai thei, Masi bazaar tur meuh chuan tu te pawh puak nawl nawl mai tur, a boruak in a zir em a lawm.


Pic 3: Puakpuan ken loh pawn pawm nawlh mai tur. Tu te duat hi na deuh tur asin!


Pic 4: Pawm ringawt zawng, ban a kham duh em mai... hlim erawh hlim ila..


Pic 5: "Mate khi khi la zawk ila, ka pi, khi khi engzah man nge?"


Pic 6: 'A nu hian hei hi min leisak se ka van ti"


Pic 7: "Saw ta mi sawn min dawr thut mai selah.... ka lakna aia tlawm pawn ani saw chu ka pe hrim hrim ang"


Pic 8:"Khawchhak churut lo hi chuan hrawk a fah tak tak lo a ni e"


Pic 9:Thil zawrhlai hi ven that tur, khawdang hawisan loh tur, an khai daih mai ang.


Pic 10: Media Vana pawn mutmu a tuah hman meuh dawn maw ni awwwww...


A tam ta, update leh hunah a dang chu ti tawh mai ang. Pathian zarah tluang takin Krismas chawlh kan hmang thei a. Naupang damdawi lama tlanpui chuk chuk ngai lovin kan tlingtla thei a, a lawmawm khawp mai. Kumthar chibai ule.