Photo Post : VIOLET 3:15 AM

Patling pui hian Pangpar bawk hi buaipui leh mai ang aw. Ngam loh Chhungpui-nu te pawi a sawi lo nge nge ang!! Violet rawng hrim hrim hi a zawn a han zawn ralah chuan a lo tlem hle mai a, Pu Bena te angin kan vak chhuak ve peih meuh si lova, awmhmun leh zin kawng remchanga kan hmuh te hi a ni mai a, kan lak phak ve tawk. Violet nasat dan indawt ni chuang lovin, ruah tla fep in a nan huh deuh Violet rawng em ni tih tur, eng par nge a nih ka hriat loh hi a hmasa berah aw...

Pic : 1 Pangpar mawi tak chu a ni, a mawina leh siamtu kutchhuak mawina hi ka phawk chhuak zo lo hrim a.
Pic 2: He par pawh hi ka vawi khat hmuhna a ni, a hming ka zawt a, ka hrereng thei lo. Kan in piah in ruak kawta an chin a ni, an pem san tak a ni. A par a mawi hle mai lehnghal a.


Pic 3: He par chu a kuhmum atangin tan ang, kan Office kawnga an chin a ni, a hming lamah hian ka hausa lo khawp mai.

Pic 4 : A kuhmum chauh zawng, a ho em mai, a par parh lai ngei hi aw.
Pic 5: Khing par no nalh tak tak karah he par, a hming ka hriat leh pek tak loh, kawldai chi khat ni hmiang, hi a lo par ve reuh a, te deuhvin a awmna biru deuh mahse, a chunga par pawr zawk leh mit la zawk te khian a mawina an ti nep chuang lo.

Pic 6: Hei chu kan bungalow a Chhungpui-nu khawi. A hming zawt ila chu enge maw sawi tur chu a inti hre ve ngei ang, a intih theih lutuk loh nan zawt lo phawt ang. Nalh ka ti ve khawp mai.


Pic 7: Nula nalh deuh te pawh hi angle khat atang chauhva thlir hi kan duh tawk lo thin. Chutiangin he par pawh hi a nalh em a, angle hrana lak han telh ve pawh a phu e.

Photo : Naupang Thlalak I 12:05 AM

Personal Blog a ni bawk a, fate thlalak post chiam pawh a inthlahrunawm em loh ang chu maw. Tun tum chu thiam ang ang a Photoshop CS3 hmanga ka chei ran vel a ni tlats. Photoshoped photo ngaihsan loh hi thil theih ve tak a ni. Mahse Nalh kan tih zawng a inang lo thei viau, kei chuan camera raw picture ngau ngau lo deuh thlir hi a nawm chang a awm ve thinin ka hria. Thiam tak maiin PS a thlalak an han chei danglam vel te hi ka en tam zawk zuk ni tlat a. Exhibition leh Competition lamah kan in rawlh ve ngam tak tak lo bawk a :D

Pic 1: A naupang lam atangin tran ang. Johan Thantluanga. Age 4.3 months. Location, kan bungalow, Assam. Lak hun chhun dar 11 vel. Lak chhan : Nau pawm ngawr ngawr hi ka taima lo khawp mai, hetia a ghari -a thut tir a nawr vel hi ka peih tawk a ni! A thla laksak nen. Nu ber nen erawh in melhrum chang a awm lo thei lo :)

Pic 2: Hei chu ka photoshop vak lo. Sairang Tlawng lui-a kan picnic a mi. Ka notebook wallpaper ah ka hmang reng thin. Amah tak hian mawi a inti. Evelyn. Age 3.8 yrs. Mood : Vawt ti, khur deuh bep bep!

Pic 3 : A u kawr hlui a ha tawk ve chiah! Rustic deuh, sepia si, a kawr rawng chi thlak lang si a han tihdanglam vel hi a nuam ve a. Mawi tak phei chu a ni law. Evelyn tho. Mood : Nalh inti.

Pic 4: A tap zo chiah a ni tih awih a har khawp mai. Naupang rilru thianghlim zia ngaihtuah hian, Lal Isua'n kan awm dan tura a duh anga awm hi thil har tak a va ni em!!

Pic 5: Esther. Age: 7.8 yrs. Mood : Inti nula awih awih!! Ka fanu hi ka va han duat tak em. Nu leh pa chuan a bu delh delh hi kan lo duat mai a nih awm hi maw. Tunah chuan Pathian zarah a tet zual laia a medical problem neih thin te a nei ta lo. Tawngtaina a dawng nasa bawk a, Pathianin a chhang a, hrisel tha tak in min ti hlimtu ber a ni ta. Pathian hi chu a va tha em!!

Pic 6: Evelyn tho. Nalh a inti awih awih em a, ti tel ve leh ang.

Pic 7: Esther. A pi Te-i'n a sam a khuihsak lai. Duh aiin a rustic mah mah em aw, ka photoshop dan hi. Mahse a ti classic ve in ka hre si a.

Pic 8: Esther: A nau pawh a pawm thei tawh a nia, nula ve tawh tak chu a ni. Mu tho hlim ve ve an ni bawk a, an phuai deuh. Pa tan chuan a mawi lohna a awm chuang lo. Hmangaihna mit hi chu a tha teh e.

Photo Post: Daidep, Dragonfly 7:18 AM

Hmanni Gas Exploration Field (ramhnuai)a kan kal chu he Daidep hi ka hmu a, ka lak hman loh ka hlau deuh a niang, Focus chiang lutuk lovin kan hmet pawp a.

Rin ai takin a ngam reuhva, ka lens kan thlak a, uluk fahranin thing tang nghah chhan in kan hmet leh a, a hma ai chuan a zia deuh.

Hei chu uluk lehzual a ka lak ni mahse, a hmaa ka hmeh aia a nalh na vak pawh ka hre lo. Ka thiam a tawp leh pek ta a niang :)

UPDATED:

Heng te pawh tah hian dah tel ve mai mai teh ang, nakinah zawn a ngaih leh takin :))

Upper Assam Thingtlang Kawng 8:12 PM

Sap tawngin han sawi ve khanglang ila, Picture Speaks Louder Than Words chang hi a awm thin. A sawi a sawi chuan ka sawi buar chuar leh viau mai thei. Chuvangin Upper Assam thingtlang khua a ka kal tlang tuma ka hmuh te hi kan vawm bei teuh teh ang, tun tum chu. Motora chuang chunga ka lak an ni hlawm a, a phe deuh te, a he / sawi deuh te a awm ang, a chaihtupa khalh muang deuh tura hrilh chhen lah inthlahrun chin a awm ve a.

Pic 1. Rural Road nei chhe ber pawl tura ka ngaih, Assam hian an lo nei chhe lutuk hauh lo mai. Nge ka kalna lam hi sawrkar ngaihsak hlawh khua an ni zawk, mar tluang tha fuu... Helai hi Moran to Bamunbari (Thingpui fe chinna hmun leh Oil mines awmna hmun pakhat) inkar kawng a ni.

Pic 2. Thingpui fe huan in kawng lehlam lehlam chu a cham put tluan chhuak a ni deuh awm e a. Khaw lum sa hulh hulh a ti dai khawp mai. Chhun nisat lai phei chuan hmun hring dup hian khaw hawi a ti nuam viau zel.

Pic 3. A hnuaia mi hi an thingpui kung phun thar na tura an buatsaih a ni.

Pic 4. Sintex tuizem ah hian Thingpui al (salted tea) an dah a, thingpui huana hnathawk te lunch atana an sem a ni. Tiffin an rawn pai vek thin na chu, hmanlai atanga thingpui al hi an lo sem thin a ni a, hemi tel lo hi chuan chaw-chhun an ei ngai mang lo. An in hnem thei khawp mai, chaw-chhun ah hian 700 ml theuh in ang vel an ni!!!

Pic 5. An thingpui sih (a hnah chung ber leh a dawt pahnihna thleng hian an sik thin) sa hi khilai Nihliap lian hnuai ami te khian an lo buk zel, an sih tam dan a zirin an hlawh pawh a tamin a tlem. Kg ah engzat chiah in nge an sih hlawh ka hre ta lo.


Pic 6. Thingpui Huan karah Buh hmun a awm bawk. A phe lutuk a, tarlan tlak ka nei mai lo. Hei hi Assamese hovin buh an chhek nan a an sak a ni. Thingtlang in tinin an nei, a then Mau chaka sak ni mahse, a ban hi Brick+cement in an ti tlangpui thung.

Pic 7. Bamunbari khua chu. A lian lo, mahse Thingpui huana thawk te chak lakna ve ber a ni.

Pic 8. Hei chu an sub-centre ve a ni. "Mum uk bak kan nei lo" an lo ti ve a ngem aw??!!! :)

Pic 9. Helai Deroi khaw thlen hma deuh hmun hi a mawiin thlir a nuam hle mai. Thla pawh hi ka lak fuh pawl tak a niin ka hria. Mawi tak a ni.

Pic 10. Oil mine tih takah hetiang Indirect Heater leh Oil exploration nana hman thil chi hrang hrang hmuh tur a awm zut mai. He Indirect Heater hi chu Pipe a crude oil an thawnna ah crude oil a WAX (sathau) awm ve ten Pipe an tih jammed loh nan kawng (pipeline) lakah tih sat/tih lum nana hman a ni.

Pic 11. Tingkhong Sawrkar Damdawi In. An in sak duh dan en hian, Ahom ho, Thailand lam atanga rawn tla thla hnam helaiah hian an bit hle tih a entir awm e.

Pic 12. Rajgarh khua sikul naupang sikul bang pawh hi te lang ve ang.

Pic 13. Naharkatya. He khua hi kum za engemaw zah ni tawh mahse, khaw hmasawn lo pawl tak a ni awm e. A khaw chhung kawng a chhe em em a, a khu em em bawk a, in leh dawr te a hlui em em vek mai a, khaw nung lo pawl tak a ni awm e. Nat. resources an neih that nen, a chhunga cheng mihringin an zir loh chuan, ram leilung hausakna ringawt hi changkanna a ni lo tih min rin nghet tirtu pakhat a ni.

Pic 14 He lui hi Buri-dihing an ti. Tlawng lui let 3 vel a nih ka ring. Driver side lam ami rem lo deuhva ka va click a nia, fiah taka lak a chakawm khawp mai.

Thlalak Chawhchawrawi - II 1:31 AM

Khua a nuam hle mai. Khawlum uap churh pawh khawilam thli nge ni, a rawn chhem kiang a, chung lam chhum dum tanpuina in uap si lovin boruak a thiang kak mai. June thla a ni lo emaw tih mai a awl ka ti.

Chung ai mah chuan "Vawiin kan chawl ve hlauh" hian boruak a ti nuam te pawh a ni mahna :) A awm tawk nau ka chhawmchhaih hnuah ka Camera ka hum chhuak a, inhmul thuar tham vel bak vak thleng pha ve lo chuan kan hawl phak phak a awm, a chhia emaw a tha emaw hi han click ve leh chawr ila, click 100 ah chuan click 3/4 te chu hmuhtlak a awm mahna tiin kan pal sir chu ka veh phei tham tham a.

Kan thenawm in ruak, hnim zet mai pal karah chuan Ram Phuihnam hi a lo par chiai mai a, a sen tak tha bawk a, mit a la zar mai.


Khawnge, duh aiin a fiah lo tlat, in bih hnai chhin teh ang



A piah deuhvah chuan kan Ar-fanghma zuai tawh lam chu a lo la rah tang ve nal nal a, a tam laiin thla ka lo la kha ka inchhir leh rum rum. Ar-fanghma hi helamah chuan K/Gunduli an ti a, tunah tak hian Kg ah Cheng 40 a ni. Kan ro rep hian a tui ka ti khawp mai.



Kan melh kual leh viau na chu, mit la tak a vang khawp mai. He hnah hi Bekang um nana kan hman thin a nia, theipui kung ang viau mahse a rah ve tlat lova, Locals ho chuan Demow an ti. He thingkung hming chawi hian khua te pawh a awm nia. An hnam serh leh sang thil a engemaw an tih khawm hian a hnah hi an khawr a, thleng (plate, thali), khuhhriang (bowl) etc atan Chaw ei nan an hmang thin. Vawi 1 Bekang kg chanve lek um nan hetiang hnah hi ka lak tir a, chutiang thleng ilo vel siam nana ti emaw min ti a ni chek ang cu, Bolero savawm-bawm khat thur hian an rawn la a, Kg chanve Bekang um nan chuan kan indaih mah mah a ni :)



Ruah a rawn sur ta chiam mai a, ruah sur thla ka lak erawh han phawrh tlak lawi a awm lova, vanneih thlak tak maiin ruah a han chu mawi em em mai hian Chhimbal a rawn zam raih mai a, kan click thin, duh angin a fiahfai thei si lo, camera setting ka khawih vel chhungin a ral leh ang tih ka hlau si, heng te hi ka hmeh chhuah theih chhun chu an ni, duhthu a sam lo viau na chu hei aia nalhin click thiam miau hek lovi!!