Sunday, March 18, 2012

Sap Ram Zin - Part 1

(Mi dang chhiar atan em em a ti pawh ni lo mah ila, hetah hian thil chhinchhiahna angreng in lo awm ve mai mai sela, theihnghilh hma a ziaka awm ve hi a that kan ring deuh a ni. Part 1 Part 2 zawng hian dah ila, vawikhata ziah teuh ka tlin ka ring lo deuh.)

          Ka thawhna Company hian a engineer te hi foreign a training turin a tir fova, Department awmna a zirin a then an kal hma deuhva, a then an kal tlai deuhva. A training lam ngaih pawimawh em em rualin, incentive pakhat a nihna lai te a awm ve a, kei pawh pute duhsakna nge, ka number a thlen ve tawh hrim hrim vang, USA a training turin min ti ve hlauh mai.


          Hetia US trip nei tur te hian kan duhna hmun leh training na tur hi kan in zawn chawp mai thin a. Ka phur em em lem loh vangin ka zawng tha meuh lo, vawi hnih khat chu internet ah ka en kual ve thuak thuak awm e. Mahse ka kalpui tur pa a phur a, a chak bawk a, a zawng taima khawp mai. Thianpa chuan Petroskill, Oil and Gas industry lama training pe thin, USA ami chu an training schedule leh topics te min raw thawn a, a tha a lawm ka ti liam ve satliah mai a, May thla ni 12 atanga tan tur, Training on Well Completion and Workover, Bakers Field, California a training nei turin Proposal chu kan company hotute hnenah kan thawn ta a.


          Hun a kal a, process chhung neuh neuh a rei a, kei phei chuan ka lo theihnghilh hman a, approval a rawn thlen meuh chuan kan training hun tur a lo pel daih tawh mai a. Mahse Foreign Trip hrim hrim hi kan hotuten vawi 1 an approved tawh chuan reschedule theih a lo ni hloh va, 11th July 2011 atanga tan turin, Katy, Houston (Texas) a Petroskill buatsaih tho , Well Completion and Workover attend tur chuan phalna kan la leh a.


          Visa apply hi an sawi huphurhawm viau mai a, kan inbuatsaih nasa rawh e. Medical test kan ti a, documents ngai an tih pawh 27 vel lai chu kan la khawm, mahse rin ang he hu a lo ni lem lo. Ka hriat tlem vang te pawh a nimahna. Ni 20.06.2011 a Kolkata a Visa Interview kan va neih pawhin zawhna 2 chiah min zawt, “Engti turin nge US kal I duh? Eng chen nge I cham ang?” tih chiah a ni. Documents pawh a file a filein ka pe lut kha a nia, pahnih chiah an la. Petroskill in training attend tur a min rawn sawmna lehkha leh kan Company in ‘hepa US kalna atana veivahna, riahna, ei man hi kan tum vek ang’ a tihna certificate chiah kha an la. Thla an la a, kut tang leh kutphah finger print an la a, VISA chu kum 10 chhung atan min pe ve mai a, harsatna kan tawk lem lo.


          Company in kan nikhat rate atana pawisa min pek zat hi a tawk angreng fu a, mahse naupang lawmzawng han hawn ve na tur help tel kan tum vang te pawh a niang, pawisa renchem dank an ngaihtuah a. Visa kan hmuh tuk chuan Authorised Travel Agent (kan company dawr bik thin te) kan pan hma in Hotelah thianpa nen veivahna+hotel etc tlawm theih dan ngaihtuahin Internet ah kan hun kan hmang nileng a ni ber e.  Plan A, B… D thlenga in siam felin Travel Agent chu kan va dawr ta a, phakar leh phakar indawr kan ni bawk a, kan nileng leh teuh hle! Trip Itinerary pawh kan duhthusam zan ni lo mahse, kan lungawina zan in kan siam zo thei a, Travel Agent te khan phakar min ti ve ngawt ang chu  . A tuk chuan kan hnthawhna hmun lamah kan let chho leh ta a.


          Chhungte hruai hi ka ngaihtuahna hmasa berah a lo lut a. Han inpuan ta deuh ila, mahni kekawrte takngial pawh su ngai lo, chaw ei dawhkana nupui te chaw chhawp ei tawp, thleng pawh seng lova tho leh tawp thin tan chuan ngaihtuahawm reng te pawh a ni mahna! Mahse sum sen belh zat tur ngaihtuahin leh kan fate kal vet a tehreng sela, an thil hmuh leh tawn te hre zui em em rual an la ni lova, ningkhawng an hriat deuh huna hruai ah ka in hnem ta a ni deuh ber mai. Kan nu ngaihdan pawh a lo ni ve chiah a, a tihzia hle mai 


          Inbuatsaihna hun thawl kan nei hi a vanneih thlak khawp mai. Thian thenkhat kal te chu Visa an hmuh tuk maia liam ngai te an ni hlawm. Planning pawh fel fai takin kan siam theih phah a. Kan zuk training na tur subject te pawh hmai a zah lutuk loh nan kan lo inen lawk ve bawk a. Hmun hrang hrang kan tlawh kual tur te pawh hawihai lutuk bik lo turin a hmun leh subject chanchin ilo vel te kan khawnkhawm a, exam em em awm dawn lo mahse hriatlohna vanga zahna tawn ka tum miah lo thung! Bakah Tourist attractions hmun hrang hrang kan tlawh turah te pawh eng eng nge awm? A enga te nge lar leh mi tlawh hlawh, hmuhnawm leh hlawkthlak ang tih te ka enkual hle bawk. Chutiang chuan theih ang tawk tawkin kan inbuatsaih ve a nih ber awm chu maw.





7 comments:

Mizohican said...

Hotupa chu i ziak ngaihnawm khawp mai... heti lai "Plan A, B… D thlenga in siam felin Travel Agent chu kan va dawr ta a, phakar leh phakar indawr kan ni bawk a, kan nileng leh teuh hle!" hi ka duh lutuk. lolz. Ni awm tak chu a ni e.

Part II kan lo nghak e.

Kanidar said...

Thank You Sir. Bengali Pha' nge kan Pha' "kar" zawk kan ti deuh mai a.. haha.

Dula said...

kanidar...nasa tak a ngaihsan zel i ni e..i thu ziak pawh a ngaihnawm...a bu a chhuah atan a itawm hle mai!

Alejendro said...

awi, kanidar, i ngaihawm lutuk. :-D

benjamin rualthanzauva said...

Keipawh ka chance vawikhatna kha passport neih loh vangin kan chan anih kha :)

Alejendro said...

Keipawh tunah hian Passport neih loh vangin ka chan.. :-D Ka la siam peih chuanglo.. ka zin chak em em lo bawk a.. hihi

Anonymous said...

nang nge nge...vawikhat zinna tur visa mamawh pawh kum 10 chung phalna an han pe thlap che nia! In zin chhung kha rei reuh sia, i lungleng hman fu lo maw? Zin leh dawn hnai em?

-bmw

Post a Comment