Bawihtei Piancham

Pic: Esther Lalfakawmi (Bawihtei)

Boruak nawm lai tak a ni, khawlum sa hulh hulh a reh tawh a, zan lam boruak phei chu a nuam tawk khawp mai. Fanau malsawmna Pathian in min pek tur pian hun tura Daktawr te sawi lawk (EDD) pawh a hnai tawh khawp mai. Zoram lam atanga hna tul em em kalsan, naute thar tur Ni chuan a paitu hnenah,"I pum te a na tawhin i hria em, i awmdan danglam deuhvin i hria em?", "Chutianga han danglam vak pawh ka hre lo, ka pum phei chu a na miah lo". Neih hun an tih hi neih hun a ni ngai lem lo ni tur a ni.

Tlai chhe tak a ni lem lo. Daktawr sawi lawk hun em pawh a la thleng lova, pum lo nat tir ngawt pawh kha a dik ber lem lo :) Engpawhnise a nghahhleh awm bawk a ni e.

A nu in a pai tan tirh leh mid-semester vel khan damdawiin a riah luh ngai khawpin a dam lova. UTI natna vangin naupai tana ei loh tha zawk damdawi tam tak a ei a ei mai ni loin, a chiu a chiu nen bul kan tan kha a nia, Nau neihna Labour room pawn lam boruak pawh a chhung lam boruak aia a zangkhaina a awm bik lo.......

Kum 8 lai a liam ta. A number zawng chuan a lo tam ve ta hle mai, rilru ah erawh nimin mai a thil thleng ang hrimin a la thar a, theihnghilh lai leh hriat tawh loh lai a vang khawp mai! Chutiang chuan nau hrisel tak ni lem lovin a thang lian ve zel a, kum 4 a nih thlengin Damdawiin lam panin thla de tir kan chhiar thin.

A hming koh duatna pawh hi koh duat dan dang a duh hauh lo, "Bawihte-i a ni tawp mai" tiin a hming hi ama inphuah a ni na chu, kan rilru a lak zia leh a nunna leh ka nunna hi a inzawm tlat zia a tilang tel awm e.

Pathian khawngaihna zarah kum 4 a pelh atangin a hrisel ve chho tran a, tun thlengin engmah harsatna nei lova Pathianin a hruaina hi a ropui kan ti thin. Kan va han lawm em.

A naute 2 an pian hnu phei hi chuan a nu tanpuitu leh thian ber a ni ta nghe nghe a, a piancham pawh "Bawihte, i lian tawh sia, tun kum chu lawm lo mai ang aw, A pu-te inah kan zin a nga, mi dang sawm lovin cake te i zai ve a nga, thilpek (gift) kan pe bawk che a nga, pawi i ti em?" tia kan zawhna pawh lawm takin pawi a tih loh thuin min chhang a, mahni fa a ni na chu, fel hi ka va han ti thin tak em.

Chutiang chuan a piancham hma deuhvin a pu-te inah kan zin a, cake te chu an zai ve bawk a. Chinese Checker Game khelhna leh kawr thar 2 a hlawh a, lungawi takin kan haw ta kha a ni a.

A piancham, ni 30 October chu a lo thlenga, an sikul (class) a chocolate a sem tur chu a nu in a kenpuia, "I birthday a ni bawk a, keiman ka han thlah ang che" tiin an in chhawmchhuak ta a. Kan sawi lawk a nih vang leh a pu te ina cake te pawh a lo zai tawh vangin a sikul rawn bang pawh chuan engmah dang a beisei em em hran lo. A naute nen an infiam a, an hlim em em tho mai. Tiang taka thuawih (mahni fa mah nise, tu ha mah a tin em lawng chu maw) fanu Pathian in min pe hi kan va vannei em!

Tlai lam a lo ni a, a thiannu, a kawm ngeih ber mai te unau chu Gift nen a piancham lawmpui turin an lo leng thut mai a. Kan vai tlangval cake kan va lei chawp tir a, an infiam hlim ngei mai. Exam hnai tawh hle mahse 'i piancham ni miau hek le, in duh tawk khan infiam rawh u' kan ti rilru a, lehkha zir turin kan nawr lem lo.

A thian te nena a birthday cake an ei vel thlalak hi dah ve reng reng teh ang.

Pic 1.: Esther Lalfakawmi, Apuii & A thiannu te unau.


Pic 2: An thil ei lai bak hi thla ka lo la miah lova, a ngai deuh tlut tlut dawn ni..


Pic3: Johana pawh a side view tal lang ve teh se


Pic 4: Hotunu pawh hi a lang khat deuhvin ka hria, tun tum chu hreh hle mahse han in pose ve reng reng teh se..