April ah Kumthar Chibai!

April thla a rawn thlen hi chuan, Pisa lama ka thawhpui te chu an kum chhiara Kumthar lawm tura inpuahchah na chuan an rilru zawng zawng a luah a, engmah dang an ngaihtuahna ah a leng lo a ni ber e. An tawngkam chhuak leh aw ki pawh tum dang ai chuan a danglam bik hial thinin ka hre thin.

North East India a State changtlung ber leh mihring tam berna, an sawrkar hnuaiah pawha kan lo beh ve tawhna state a Assamese hnam te hian kutpui 3 an nei a, an kum chhiar dana thla hmasa ber, Bohag, Leilet buh an thara an ah(lak) zawh tawh hnu leh an awllen lai, ni hmasa ber (14 April) atangin an kutpui ber Rongali Bihu chu an hmang thin. An kutpui dang pahnih Kati Bihu leh Magh Bihu te chu nidanga sawiah khek ila, engtin chiah nge he an hunpui ber Rongali Bihu (Bohag Bihu an ti bawk) hi an hman thin sawi tum ila, maipawl pu kher lovin kan beng tihvar in tum teh ang.

Hnam tin hian Kutpui kan hman hun hi kan awllen lai leh boruak nawm lai a ni tlangpuiin ka hria. Assam ah pawh mi tam ber te eizawnna thin, la ni mek, leilet neih hunbi chhiar dan zulzuia he an kutpui pawh hi hman thin a ni. Tin, a ram boruak nawm lai tak a lo ni lehzel bawk nen, kut ve ngai lo pawhin hrehawm kan tih chang kan theihnghilh fo thin!!!

Kawng dunga thingphun lang ngaw khup mai atang leh ther hlo ila kan chinna nul kara thingbuk chawr no te te kar atang chuan Kuli (sava chi khat) te pawh an rawn hram raih raih leh tawh a, naupang chinchang hre lo chuan an beng an tun hra thin. A mawina pawh lo mah ila, khuanu duan ang taka a hun taka rawn inlana, an aw theih anga mawia an rawn chhuah hun hi hunbi engemaw tak chu a ni ve chek ang. Chumai a ni lo, keteki par rimtui em em mai chuan boruak thiang tak mai chu a pawlh riai mai a, sava chi hrang hrang nahar (Herhse) chawrno kara an inchhaih nak nak tawh hi chuan, Zoram emaw tih mai a awl thin.


Han hawi sang deuh ila, Chhura rual zet mai thingkung sang tak tak kak kara Kapou (nauban) var lo par uai nal nal mai te chuan an culture a nauban beh ngheh dan te min ngaihtuah tir a, kuhipat (thing hnah chawrno) thliin a chhem thlek heuh heuh te chuan lung lam lam zu kuai ve thei nia maw le.

Chu hun ngei ah chuan a ni, an Rongoli Bihu chu a lian a te in hlim taka an hman thin ni. Bohag thla hmasa ber ni hma chiah(13th April) chu Uruka an ti a, chu chu kum khata thla hnuhnung ber Chaut ni tawp ber ni tihna a nih chu. Chumi ni chuan Goru Bihu (Bawng Bihu) an hmang thin. Bawng hi an sakhaw vawn Hinduism vanga a sa an ei lohna ai mahin an nunphunga a beh hneh em avanga a sa ei lo hi an ang mah mah zawk thin. An leileh atanga an ei tur bawnghnute atang siam chi hrang hrang (An chhungkhat laina hnai an thiha ni engemaw zat chhung an ei theih awm chhun chu bawnghnute atanga siam te an ni hlawm) te, a ek an hman tangkai dan te ngaihtuahin a sa lehzel ei em chu an ti pawh a ni mahna. Engpawh nise, an nunphung ah hian a bet nghet hle mai a, ni hranpa ngat an Bihu pui ber pawn an serh thin. Goru Bihu chuan an bawng te poghas (jute atanga siam hruizen) tharin an kai a, luiah mah-halodhi (dal chikhat mati dal leh aieng hel nuaisawm pawlh) in an bual thin. An bual lai hian.... "Lau kha, Bengena kha, Bosore bosore barhi ja, Mar horu, Baper horu, Toi hobi bor bor goru" (Um-ei eiin, Bawkbawn eiin, a kum telin thang ang che, I chun leh zua ria deuh mahse, thrang lian thur thur nang che nang zawng) an ti thin. Zanah Bawng in an thenfai ah chuan thosi hlauh atan jak (katchat-fern chi khat) ro an hal khuk sak thin. A then te chuan Makhijyoti thing tangin an hawl thin bawk.

Hemi zan hian thlai chi hrang hrang chi 101, a kha deuh te, thlum deuh te, thur deuh te, hang deuh te, a chikimin bel khatah an siam a, an ei thin. Hring nun hi hlimna te, lungngaihna ten puan zeh mawi tak angin a thelh mawi thin a ni tih lantir na a ni e, an ti.

A tuk, kumthar ni chu Mahnu Bihu (mihring Bihu) an ti a, mah-halodhi a an inchulh hnu ah kumhlui bal zawng zawng an bual fai thin! Mitinin thawmhnaw thar an ha a, an Pathian biak na Naamghar ah an kal thin. Hetih hunah hian ei leh in an uar hle mai a, anmahni hnam dish an ngai pawimawh hle. Pithas (Rice cake ang deuh) leh Jalpan (thingpui hmeh?!!) an ei nasa hle. An inah lenglut ila, anmahni siam ngei Jalpan leh Pitha kan ei loh chuan an ngaih a tha ngai lo. Pitha hi chi hrang hrang an nei a, chhawhchhi tela siam Til Pitha te, Coconut tela siam Narikol pitha te, Chira Pitha (Changper a siam) te, bel lei atanga siam bela an siam pitha takeli pitha te an ni hlawm. Til Pitha hi a tui ka ti lawr lak.... loskara (coconut ladu) nen ei pawlhin :D

Jalpan pawh an nei nual mai, aakhoi (buhfai chi khat kan puah/pawrh)te, hurum (Hali Rice an tih atanga siam, sacramental bread ang tak, pan thler mai) te, Chira (Changper) te leh pitha guri (Buhban den pherh kurtaia hmeh) te an nei ve duah, ka hre vek seng lo.

Magh Bihu a an tih ang deuh thoin an ina chuang lut mai bakah an ngaihpawimawh te chu an ina ei in turin an in sawm tawn thin. Mizo te hian Assamese te kan tluk lohna langsar deuh mai kan neiin ka hria a, chu chu ei leh ina induhsakna kan lantir dan hi a ni. Anmahni ei ai hi mi an pe phal tak meuh meuh a ni. An inah chuang lut ila, hna dang zawng zawng kalsanin kan ei tur zu buaipui ngar ngar peih hlawm a maw le. Bazaar atanga an lei in chhawp chu inhmuhsitna ang hial a ni mai awm e, anmahni ngeiin a thar an siam kher thin.

He an kumthar ah hian a thei thei Naamghar ah an kal a, ei tur ilo (chhum hmin ni lo) horai (an thleng serh) in an va hlan thin. Zan lamah chuan Krismas carol ang deuhvin in tinah Hussori (Bihu Carol a ni ber awm e); Dhulia (drummers) te, pepa (seki) tum te leh gogona (maua siam ri tret tret thei) an sam trawna thiat farin Bihu lam thiam nula tlangval ten khua an fang thin. Hmun thenkhatah chuan Bihu lam intihsiakna a awm thin a, ni 5 te a awh thin. Chungah chuan an hnam hmeichhe incheina muga mekhala(an tualchhuak silk pangang atanga siam pawnfen) Chaddar (chutiang thova siam shawl sei an kawng atanga an dar a an bah liam, kawngah bawk an veh leh thin) te, riha (chaddar thing hnah atanga siam) te, joonbiri & dhulbiri (bengbeh chi 1) te, kerumani (thri) te, gamkharu (ngun lian) te an in bel thin. A ngei ngeiin Kapou phul (nauban par chi khat) an samah an tawn bet bawk thin. Chutiang chuan an thuam neih thar ang ang te ha in naupang, nula tlangval te pawn an zui bawk thin. Nuam an ti ngang thin mai.

He kut hi thil an inpek tawn kut a ni te pawh a tihtheih awm e. A bikin an farnu te leh an nu leh pa, pi leh pu te chu thil thar an leisak ngei ngei thin. Tianga thil inpek tawn hlimawm zia hi chu tel ve loh chuan hriat a awlai lem lovin ka ring :D

Keini meuh pawh, a lipuia lut ta fam chu, fanu fapa te nena inkai pherh rual kan lo ni ve tawh a, ka la beisei ngai reng reng loh leh tum chhinna reng reng nei ngai lo khan, kan Club chhete a eng eng emaw Bohag Bihu related function a awm thin avangin, kan fate tan eng eng emaw ka lei khawm a ngai ve a. When in Rome, Do as the Romans do an ti em khah? nia, bazaar tur chuan ka chhuak ta poh kha a nia. An mekhala Chaddar tur atangin tran ang ka ti a, an muga dawrah ka lut a, an neih tlawm ber kha set khat Rs 4500/- a ni hem mai!!! Function vawi hnih khat atana naupangin an hak mai tur atan chuan to ka ti deuh nge, dawr te lamah a lem ka zawng ta a, ka hmuh tlawm theih ber Rs 600/- man, muga rawng ang deuh ka hmuh kha chuan lawm tak ka ni!!! Fanu pahnih neih manah Rs 1200/- chu kan thehchhuah kha. A dang incheina neuh neuh, gamkharu, muthigaru, dhulbiri leh kerumani te chu sawi tawh lo mai ang, kan inpuan fai lutuk a nge. Kopou phul lem, plastic a siam a lo awm hlauh te khan kan fairel bel a phai phah lo hlauh ka lawmzia te pawh kha sawi lo mai ang :D

Assamese Kumthar Chibai vek ule.