Tuang Chhah!!

[Ref.: Pu Buanga Dictionary- Link ]

tuang, n. the bristles (on the back of a pig, hog-badger, etc).

[Pu J.F Laldailova English Mizo Dictionary]

mane (mein), n, tuang bakbuk.

&

crest (krest), n. sava thlikthlidir, ar leh sava chhuang or owg, thil chhop sang lai, tlang

chhip or tlang dung (a sahmul then lai). inchung chhip, tlung, sakawr tuang, thir

lukhum chunga a cheimawina ar hmul leh thil dang buk, tuifawn pawng lai, v.t. hneh,

chuan.

"Ani hi chu a Tuang a chhah ve hrim hrim a, engtin pawh tise a dawl zo hrim hrim"

"Ani ang be tur chuan Tuang tih chhah ve deuh a ngai a lawm"

......... kan ti thin. Mizo ah chuan Tuang chhah kan hmanna hi chu a chhe lam kawk deuh, negative lam awn deuh a ni thin. Chutiang mihring pawh chu min an en dan a dang deuh te pawhin a hriat thin. A awmzia tak man a har fu mai thei, keia hriat danah chuan, Mi dangin zahthlaka an ngaihah leh awm lo tihna ah pawh zak chuang lem lo, awm lo ti awm pawha lang lem lo, an tihduh leh tum mi hmaizah vanga thulh lem lo sawina lam kawk niin ka hria.

Mizo society ni lovah hnathawkin thangkhat lian dawn kan tei ve ta a, a tha leh tha lo pawh zir chhuah a mual mual chu nei ve tawh turah kan inngai ngawt a, a tam a tlem erawh thuhran.

Ka thawhna Department a lu ber chu tun April ni 30 a pension tur a ni a. Headquarters atang a hla tak, Site Office (ti ve mai ang) a mi 50 vel lek enkawla post ka nih vangin, amah han thlah buai tumna em em pawh ka nei hran chuang lo. Chu ai mah chuan, heti chen vai zinga ka thawh hnua ka mi ngainat loh ber a nihna chu amah thlahna lam rilru ka put loh chhan a ni zawk mah awm e.

-----------------------------------------------------

Ka hmuh hmasak ber chu 2005 March thla ni ta in ka hria. Ka la hrereng, kan departmenta an rawn post tirh a ni a. Office hna tulah a office a ka luh a ngai a, Ka hming atang chuan anmahni hnam ka ni lo tih a hriat vang nge, a tawngkam chuak ka tawn hmasak ber chu "Get Out, don't you see I'm busy?" Tuang ti chhahin A secretary in ka hming leh amah ka hmuh duh chhan a pass-in tawh hnua a room a luhtir ka nih sawi chu khawilam, a rang a rang in ka petek chhuak leh a nih kha. Midang tam takin kan department hi an rawn Head tawh a, hna tula luh dil a ngaih pawh ka hre ngai lo. Sawisel hlawh ve pawl tak chu a ni hrim hrim na chu midang a hnawhchhuah em chu ka hre lem lo.

Chumai a ni lo, hna lam thilah keimah by-pass in ka hnuaia mi, anmahni hnampui hlir a contact thin. Ka thawhpui te pawhin tihngaihna vak an hre lo, kan nui leh ngawt thin. Mahni chanpual bakah tul thut thil, ka mawhphurhna pawh ni em em lem lo te ngawrh takin ka thawk chho ve zel a, Gas khur hungna thar (misualin an ruk theih loh tur, security personal deploy ngaih lohna) te; Khawl rit chawi kanna, man tlawm si, keimahni hmanraw neihsa atanga siam mai theih te; Gas a lo thlawna hal (Flaring) tih tlem nan Process Piping thar te leh chi hrang hrang kan duangchhuak a, Kan khawl leh Plant a efficient zawk nan engemaw zat kan modify a, chutiang chuan kan theih ang angin innovative thil kan ti ve a, credit ah erawh ka hming a lang ngai lo. Vawi khatmah a tilang lo.

Kum a vei dawn hnai ta. Engtinnge ka tih ang aw? tiin ka inngaihtuah a. Pawng rilru nata in dawm kun ringawt khan eng kawng tha ah mah min hruai thleng dawn lo tih pawh hrilh kher ka ngai lo. Ka Tuang Pan zia leh chu chuan mi min ngaihdan a hruai thui zia chu hmuchhuak vein ka inhria a. Hmn hmn hmmmm.... ka ti a, tuang tihchhah ka zir ve ta a ni.

Melhin biak pawh min be duh lo mahse keiman ka be hmasa zel a, min chhan miah loh chang a tam zawk. Tuk khat chu Tuang ti chhah zualin report hrang hrang la tura a rawn phone hmain keimah ngeiin phone in ka va pe a, chumi khami chu phone kha han pe teh a tih pawn."He report hi keima pek tur che a nia, chuvangin report ka pe phawt ang che nga, chumi zawhah phone chu ka pe ang" ka tih ve hmak ta a, report ka pek zawh chuan midang pawh chu a be zui ve ta chuang lem hlei lova. Team anga kan tih that awm ve chhun tlemte ah pawh ka hming a awm ve loh chuan a chhan ka zawt ve hmiah hmiah ta a, tu te pawn chutiang a han tih chu awm lo an ti viau ang, mahse Tuang Tih Chhah a ngai tlat. Zaha ka lak chuan kan zak ral thei mai dawn a. Chutianga Tuang Ti Chhah a tan kan lak hnu chuan Mizoram retheih zia leh la hnufual zia ka hriat phaka a sawi te, Kristianna in NE state a insurgency a tih tam phah thu a sawi te, Kan bawngsa Uisa ei (ka ei duh thu ka sawi ngai hauh lo na chu) ner nunga a sawi chhen te pawh a sim ve ta in ka hria. Mi pawh a by-pass ngai ta lo. Fapa kan neih pawhin min rawn congratulate ve hial!!! Hlawhtling thawkhat viauin ka inhria.

Mahse, heng zawng zawng hnuah pawh kei chuan ka la ngaina thei chuang lo. :( Chu erawh keima po-rob-lem a ni ta!!

-------------------------------------------------------------

Helai ka awmna a an lo tih thindan a nih vangin amah thlahna pawh chu kan buatsaih ta a, kei pawh phur hauh lo, phur hmel tak in ka awm ve a ngai a. A dera nun hi a tul chang a awm thin. Zakzum tak pawhin Tuang tih chhah a ngaih hun a awm thin. Amah thlahna thusawi erawh DAWT hlang deuh thaw ka sawi a ngaih avang erawh kha chuan ka zan mu tur tawngtai kha chhanin awm tak maw?